الخميس 7 أبريل 2022 05:14 مساءً - أكتر حاجة تضايق الشخص وتعصبه هو إن تضيع منه فلوس أو يتخصم منه فلوس من غير ما يعرف السبب، خاصة في ظل الظروف الصعبة اللي بنعيشها من ارتفاع أسعار السلع ومعظم المواد.

وعشان ماتتفاجئش، في حالة معينة هيتخصم فلوس من رصيدك الموجود على الفيزا، هو ليس بمبلغ كبير، بكن الأمر ممكن يتكرر أكثر من مرة فتلاقي مبلغ معقول مخصوم منك وانت مش عارف السبب.

أولاً خلينا نعرف إيه هي الحالة اللي فيها هيتخصم فلوس من رصيدك الموجود على الفيزا، ودا وفقًا لما أعلنه البنك المركزي.

وهي إنك لما تيجي تستعلم عن رصيدك الموجود في الفيزا من ماكينة صراف ألي، غير الماكينة التابعة للبنك الخاص بيك،

وطلبت إيصال بالرصيد الموجود في الفيزا، وهنا هيتم خصم رصيد من رصيدك، وبتختلف القيمة المخصومة من بنك إلى آخر.

في ناس دلوقتي هتستغرب وهتقول هو مش فيه مبادرة من البنك المركزي مستمرة حتى شهر يونيه ومفروض هذه الأمور مجانية؟،

الإجابة لا، لأن البنك المركزي قرر بالفعل إلغاء رسوم السحب والاستعلام عن الرصيد من خلال ماكينات الصراف الآلي ATM،

ودا في حال عدم طلب العميل إيصالا ورقيًّا أو الاكتفاء بقراءة الرصيد من شاشة ماكينة الصرف الآلي.

السبب وراء الخصم من الرصيد في حالة طلب إيصال

– تقليل تكلفة للورق والحبر المستخدمين في طباعة الإيصال.

– إلغاء إيرادات البنوك التي كانت تحصل عليها من عملائها وغير عملائها عند السحب.

– كمان بيكون في ورق كتير على الأرض حول الماكينة، وسلات القمامة بتكون مليانة، ودا بيحتاج لعمال نظافة.

-الماكينة بتتوقف عن العمل أكثر من مرة لشحنها بلفافات الورق.

رسوم طلب إيصال الاستعلام عن الرصيد من بنك أخر

– البنك الأهلي المصري: خصم 50 قرشا للاستعلام عن الرصيد لعملائه وغير عملائه، ومجانا دون إيصال.

– بنك مصر بيخصم 50 قرشا للاستعلام عن الرصيد لعملائه وغير عملائه ومجانا دون إيصال.

– بنك QNB خمسون قرش علي عملائه وغير عملائه.

– بنك القاهرة، بيخصم 5 جنيهات عند الاستعلام عن الرصيد عند استخدام عملائه ماكينة أخرى.

– البنك العربي: خصم 3 جنيهات عن الاستعلام عن الرصيد.

– بنك الإسكندرية: 3 جنيهات للاستعلام عن الرصيد في حال استخدام عملائه ماكينة أخرى.