باسل النجار = الرياض في السبت 25 نوفمبر 2023 01:39 صباحاً - الراجل اللي في الصورة على الشمال ده اسمه “ايهاب الورفلي” مهندس حاسب آلي من ليبيا وعمره 50 سنة وقت كتابة البوست ده .. لحد هنا الكلام عادي جدا لكن اللي مش عادي هو حكاية شهرته وهو طفل صغير.
ايهاب هو اللي قام بدور الطفل “علي” في الفيلم العالمي “اسد الصحراء” .. او زي ما احنا نعرفه بإسم “عمر المختار” واحد من اعظم الافلام التاريخية العالمية بطولة الممثل الامريكي العالمي “انتوني كوين” ومن اخراج المخرج السوري مصطفى العقاد.
ايهاب بيقول انه ما كانش عايز يبقى ممثل و عشان كده ما اشتغلش في التمثيل بعد كده … لكن تم اختياره للدور بالصدفة البحتة لما المخرج مصطفى العقاد بعت مجموعة من مساعديه لأحد الحضانات في ليبيا عشان يختاروا مجموعة من الاطفال عشان الادوار المطلوبة في الفيلم ومنها دور “علي”.
فعلا المساعدين راحوا صوروا كل الاطفال الموجودين صورة جماعية عشان يتم اختيار مجموعة منهم للتمثيل في الفيلم ومن ضمنهم ايهاب اللي تم اختياره في عمر ٦ سنوات عشان يأدي دور الطفل “علي” واختاره المخرج “مصطفى العقاد” بسبب الشبه اللي بينه وبين الممثلة اللي ادت دور الام في الفيلم.
بيحكي ايهاب ان “مصطفى العقاد” بذل مجهود كبير معاه عشان يطلع منه الاداء اللي هو عايزه وانه ما كانش بيخليه يحفظ السيناريو عشان ما ينساش .. لكن كان بيمثل الجمل قدامه اكتر من مرة وكان بيقعد يلعب معاه فترات طويلة جدا عشان يأدي من غير توتر ولا قلق.
رغم ان التمثيل ما كانش من هواياته ورغم ان عيلته كلها كانت رافضة انه يمثل في الفيلم ويقال ان الحكومة الليبية وقتها اجبرت عائلته على الموافقة ورغم كده نجح ايهاب في أداء دور الطفل ببراعة وخلانا كلنا نفتكره ونفتكر رد فعله مشهد اعـ*دام عمر المختار في نهاية الفيلم.
بيحكي ايهاب ان تمثيل مشاهده الصغيرة في الفيلم استغرق حوالي ٣ شهور وانه ما اخدش اجر مادي في الفيلم .. لكن المخرج والانتاج جابوله هدية مجموعة من الالعاب عن دوره في الفيلم … و الاهم انه حيفضل جزء من عمل فني رائع بيجسد شخصية تاريخية اسطورية محدش حيقدر ينساها.
ملحوظة .. المهندس ايهاب تواصل مع ادمن ورا الكاميرا وتم التأكيد على القصة واضافة بعض التفاصيل.