باسل النجار = الرياض في السبت 2 ديسمبر 2023 05:21 صباحاً - – فيه إشاعة انك مغرور أوي وانك بعد النجومية اتغيرت جدا ونسيت انك من منطقة شعبية
= نسيت إيه ده انا كل أسبوع في بيتي القديم .. لا طبعا مفيش الكلام .. غرور ايه و بتاع ايه ده أنا أصلا بفتخر إني من منطقه شعبية من #عين_شمس .. هو انا كنت عمري اتضايقت ان انا من منطقة شعبية؟! .. انا البيت اللي كنت عايش فيه زمان أبرك من اللي انا فيه دلوقتي .. راحة بال وجار بيخبط عليك وجار بيندهك لكن انت النهارده كل واحد في حاله
– عمرك فكرت ترجع تعيش تاني في عين شمس تاني؟
= كتير بس مش هينفع مش هعرف .. الحياة اختلفت معايا في شغلي وهيبقى بعيد عن أماكن التصوير لكن انا قلبي هناك أصلاً .. هو في أحلى من انك تروح لالبان #حبشى تقوله عايز 1/8 رومي؟ والا تأخد طاجن فراخ من كشرى السلطان – Koshary El soltaan احمد عرابى دي قصة تانية وحياة تانية .. الحمدلله على ان الواحد وصل ان يبقى عيشته مرتاحة اكتر لكن ولا ربع راحة البال بتاعت زمان وقعدة قهوة #عماد وانت شايف الشارع والناس قصة تانية .. ويقولك نسي اصله! .. نسي أصله ده لو انا بنكر انا مقلتلكش اني طالع من جاردن سيتي ولا يلزم مع احترامي لجاردن سيتي لكن هما دول الاصول و الجدعنة والتربية .. النهارده انا لو مابقيتش احمد العوضي ومابقيتش نجم هرجع بيتي وهيشيلوني على كتافهم لكن اللي انا عايش معاهم النهارده مش هيعرفوني .. لكن ده حبك من وانت ولا حاجة ناس طيبة
– لسه ليك ناس هناك بتروحلهم على طول وتزورهم؟
= طبعا .. انا اصحابي هما هما .. دول اللي كبرت معاهم وبتكلم معاهم براحتي خلاص هما عارفينني من زمان لكن اللي عارفك النهارده عارفك على الوضع اللي انت فيه ملوش دعوة بزمان هو بتاع النهارده .. اللي انا ساكن معاه في المنطقه الحلوة دي لو انا كنت جيتله وانا العوضي بتاع زمان اللي في عين شمس كان هيقف يتكلم معايا؟ لكن دول لأ .. دول بيحبوا اللي جواك فانا بنتمي للناس دي
– يعني انت عايش مع الناس دي بس مش بقلبك وروحك.. قلبك وروحك في عين شمس؟
= ايوا عشان دول الحقيقيين
– والمجتمع بتاعنا مش مجتمع حقيقي؟
= لا كل ده هجص .. انا بقول الصراحة وانا محدش ماسك عليا زلة ولا كاسر عيني انا بتكلم بأمانة .. الناس دول هما الناس هما اللي بجد هو بيتكلم معاك ومايعرفش انت في جيبك كام لكن ده بيتكلم معاك وهو مقيمك على اساس انت في جيبك كام و عربيتك نوعها ايه .. فلو انا مغرور مغرور مع دول لكن مع دول لا انا معاهم تحت الارض لان هما حقيقيين .. مش لازمه حاجة منك غير الكلمة الحلوة ونقف نتبسط ونروح ع الكشك انا عيشت الكلام ده وكنت مبسوط فيه أكتر .. انا مش بتكلم على حاجة من وحي الخيال انا عيشت ده وده وكنت مبسوط بده أكتر دي وجهة نظري واللي يزعل مني ولا فارق
