باسل النجار = الرياض في الأحد 3 ديسمبر 2023 05:07 مساءً - اول ما انضمت فردوس حسن لفرقة رمسيس كان عندها 15 سنة وعلشان كده يوسف وهبي كان دايما يديها ادوار الصبيان الصغيرين لحد ما فردوس زهقت وبقت تحلم باليوم اللى تعمل فيه دور شابه او بنت كبيرة.. بتحب وتتحب والكل بيجري وراها..

حاولت فردوس تلفت نظر الاستاذ يوسف انها ممكن تعمل ادوار بنات عادي خصوصا وأنها علي قدر وافر من الجمال لكن كل محاولاتها فشلت.. فراحت فى يوم لمصور وقالت له صورنى .. ولبست كعب عالى وفستان ع الموضة واتصورت فى وضع جذاب زى ما قالت.. وطبعت من الصورة كذا نسخة راحت لزقتها على جدران الفرقة.. لحد ما عدي الاستاذ يوسف ووقف قدام صورة منها وبدأ يسأل نفسه “انا شفت البنت دى فين”.. وهنا استغلت فردوس الحدث وطلعت جري عليه وهى بتقول” ايه رأيك في صورتي يا استاذ؟” وهنا بص لها الاستاذ يوسف من فوق لتحت وقال “اجري يا شاطرة غيري ملابسك والبسي ملابس الولد علشان دورك قرب”..