باسل النجار = الرياض في الجمعة 8 ديسمبر 2023 12:15 صباحاً - توفيت المنتجة ناهد فريد شوقي اول امس،وبعيدا عن كونها بنت وحش الشاشة فريد شوقي وبنت هدى سلطان وخالها محمد فوزي.. وخالتها هند علام.. يعني مفيش أحسن من كدا.. بس ناهد كمنتجة كان ينطبق عليها “ابن الوز عوام”.. لأنها كانت بتختار أعمال قيمة جدا.. وخد عندك مثلا حديث الصباح والمساء ولن أعيش في جلباب أبي وفيلم مهم زي هستيريا غيره..

ناهد اتجوزت لأول مرة من اللواء أحمد مرشدي وخلفت منه فريد ورشا وغفران، فريد دا اتسمي على اسم جده طبعا.. وفريد دا اتجوز من سوسن بدر.. ودي كانت صديقة والدته، وحتى سوسن بدر بتحكي قصة جوازها من فريد وبتقول انها اول ما حست ان فريد مهتم بيها وبيحبها، كمت ناهد وقالتلها، فناهد ردت عليها: “آه ما انا عارفه انه معجب بيكي، خلي علاقتك بيا غير علاقتك بيه، ارتبطوا مارتبطوش، علاقتنا احنا كأصدقاء خليها بعيد”.. وفعلا اتجوز من سوسن بدر وبعدين تم الانفصال..

علشان يتجوز سنة 2008 من داليا البحيري.. وخلف منها بنتها الوحيدة قسمت.. واتطلقوا سنة 2013.. لكن فريد نفسه هيموت في حادث مروع في سنة 2014 على طريق السويس الصحراوي.

المرة التانية اتجوزت ناهد فريد شوقي من المخرج والمؤلف مدحت السباعي وخلفت منه ناهد السباعي الممثلة المعروفة ومحمد… وطبعا سمى ناهد على اسم مراته لانه كان بيحبها.. مدحت السباعي اتجوز 18 مرة.. ايوة انت قريت الرقم صح .. 18 مرة.. لكن انفصل عن ناهد فريد شوقي..

ناهد فريد شوقي مع بنتها ناهد السباعي لقوا سيناريو كاتبه مدحت السباعي اسمه 6 في الارشيف.. فقررت ناهد ترجع بيه للانتاج ويا ريتها ما رجعت.. مفيش فيلم شاف مشاكل في الدنيا قد الفيلم دا.. الفيلم بطولة أحمد الفيشاوي وطبعا ناهد السباعي وجابوا مخرجة اسمها ايناس سيف.. وداليا البحيري.. اولا داليا اعتذرت فجابوا شيماء سيف.. ومش عارف ايه العلاقة بين الاتنين..

ثانيا احمد الفيشاوي صور يومين.. وقال هاي جماعة انا مش جاي تاني.. يهديك يطيعك.. قالهم عليا الطلاق ما انا مصور.. فاترفع عليه قضية.. جابوا احمد فهمي (واما).. وهوب الدنيا بتمشي.. تحصل خناقة بين المخرجة وبين شيماء سيف.. فالمخرجة تسيب الفيلم وترفع قضية.. يجيبوا مخرج العمل فالمخرجة تطلب بوقفه.. والفيلم في النهاية نزل ومحدش حس بيه.. اسمه اللعبة الامريكاني…

الله يرحمهم جميعا..