باسل النجار = الرياض في الأربعاء 24 يناير 2024 08:53 مساءً - في يوم من الايام رن التليفون في البيت زهره العلا ولقت على الخط واحده صاحبتها بتقول لها “يا زهره انا هرجع لك في الخدامه مكاسب اللي انتي بعتيها لي علشان تشتغل عندي”..

طبعا زهرة اتخضت لأنها مكنتش عايزة مكاسب ترجع تاني .. وقالت انها على قد ما هي طيبه ومخلصة وكل حاجه لكنها كانت من النوع اللي لما يجي يكحلها يعميها..

وحكت زهرة موقف واحد بس.. وقالت انها فتره من الفترات كانت بتصور فيلم لمده 16 ساعه في اليوم..فكانت تصحى مع اذان الفجر تجهز وتنزل تروح تصور.. ينتهي التصوير وقت الغروب وترجع البيت.. ومن كتر ساعات التصوير جالها ارق وبقت مش عارفه تنام غير لما تاخذ المنوم …

وفي يوم من الايام رجعت زهرة من التصوير وطلبت من مكاسب تجيب لها حبايه المنوم عشان تعرف تنام.. فاختنا مكاسب راحت شويه ورجعت قالت لها “يا ستي مش لاقيه حبوب المنوم”..

فزهرة قالت لها حاولي تلاقيها لاني مش هقدر انام من غيرها وما فيش صيدليات فاتحه دلوقتي..

فاتت ساعة قول اتنين وهما بيدوروا ويشيلوا ويحطوا.. لحد ما زهرة العلا راحت في النوم من كتر التعب.. لكن بعد شوية لقت مكاسب جاية تصحيها وهي طايرة من الفرح وبتقول : “ستي ستي افرحي يا ستي .. لقيت حبوب المنوم قومي بقي ابلعيلك حباية علشان تعرفي تنامي”.. وطبعا وقتها ادركت زهرة أن بقاء مكاسب مفيهوش اي مكاسب فزحلقتها علي صاحبتها..