باسل النجار = الرياض في السبت 6 أبريل 2024 08:24 مساءً - حكاية فنانه أسمها زكية فوزي ، سنعرفها فيما بعد بأسم “مها صبري” صاحبة أغنية “ما تزوقينى يا ماما”..
اتولدت يوم 22 مارس 1932 .
مها عاشت طفولتها مع امها بعد ما أبوها طلقها وبقت تشوفه فى المناسبات وبس.. ويمكن حالة الوحدة اللى عاشتها فى طفولتها هى اللى خلتها تدور على أى حاجة تخرجها من العالم الكئيب ده.. لحد ما لقت الحل فى الغنا..
فى المدرسة كانت مها بتلاقى ملاذها الأمن فى أنها تقف بين الفترة والتانية وتغنى لزميلاتها اغانى ليلى مراد.. بينما الكل منسجم ومتسلطن.. لحد ما صيتها سمع وبقت رئيسة فريق الاناشيد..
وبعد شوية تانيين بقت مها محط اهتمام المُدرسات.. وكانت كل مُدرسة تدخل الحصة تخليها تغنى.. اللى بتحب ليلى مراد تقولها “يا مها غنى أى حاجة لليلى مراد” .. اللى بتحب شادية تقولها “غنى لى حاجة لشادية” .. اللى بتحب نور الهدي.. وهكذا..
من كتر ما مها كانت بتغنى للحب.. لقت نفسها بتفكر فيه.. وبتستناه يدق بابها فى أى لحظة.. لحد ما حصل المراد من رب العباد.. ودق الحب الباب.. وجه الحبيب يطلب ايديها..
وقتها امها رفضت وقالت ان لسه لها سنة وتاخد التوجيهية وبعدها تبقى تتجوز.. لكن الحبيب وحبيبته كانوا مستعجلين وتمت الجوازه..
بعد فترة من الجواز تجرأت مها وطلبت من جوزها أنها تغنى لكن الراجل اللى كان محكوم بعادات الوقت وتقاليده قالها “مينفعش.. ولو عايزة تغنى يبقى وانتي مش مراتي”.. فالست قالت بناقص الغنا وخلينى زى ما انا فى بيتى متهنية معززة مكرمة ..
بعد فترة حست مها أنها مش قادرة تقاوم الحلم.. فقررت أنها تخوض مع جوزها جولة تانية من المفاوضات على أمل أنها تقنعه بإنه يسمح لها بإنها تغنى فى الاذاعة وبس.. فالراجل وافق واتقدمت مها صبري لاختبارات الإذاعة ونجحت.. وبدأ صوتها يوصل ويسمع لحد ما سمعت عنها الست ماري كويني وطلبت أنها تعمل لها تسيت كاميرا علشان تقدمها للسينما بفيلم جديد ..
طبعا اول ما قالت لجوزها هددها بالطلاق .. فمها خافت على استقرارها الأسري وقالت “بناقص التمثيل فى السينما” خصوصا وأنها مكنتش حابه أن تجربة طلاق ابوها وامها تتكرر تانى.. لكن بعد فترة برضه حست أن النداهة بتنده علشان تاخدها لسكة التمثيل.. فصارحت جوزها برغبتها فى أنها تخوض التجربة خصوصا بعد ما قدم لها المنتج الكبير جبرائيل نحاس فرصة مهمة للظهور فى السينما.. وهنا الزوج قرر أن ينفذ تهديده وطلقها… وكانت المفاجأة أنه عمل لها حفلة وداع فى كازينو كبير .. ويومها اكد لها انه بيتمنى لها كل النجاح وودعها بينما دموعه تنهمر على خده..