باسل النجار = الرياض في الثلاثاء 11 يونيو 2024 01:32 مساءً - كتبت الناقدة والكاتبة ماجدة خير الله :

في سنة ١٩٩١ قدمت لأفلام التليفزيون فيلم إسمه الجوهرة بطولة تحية كاريوكا، وعبد المنعم مدبولي ، وحسن حسني ، وندى بسيوني، وطبعا بين الإستعداد للتصوير كانت الفرصة متاحة للدردشة مع الفنانة الكبيرة تحية كاريوكا، وسألتها عن القصة اللي كان الناس بتتناقلها وكأنها حقيقة لاتقبل الشك، هل فعلا قمت بضرب النجمة الأمريكية سوزان هيوارد ، عشان قالت كلام سخرية على مصر في دورة مهرجان كان 1956 !طبعا ضحكت تحية كاريوكا وقالت تفتكري أنا ست شرشوحة ممكن أعمل كده؟ هل أنا مجنونة؟ بقى نبقى رايحين في وفد رسمي نمثل بلدنا ومعانا ناس محترمة المخرج صلاح أبو سيف وناس من الحكومة؟ وأنا أشتم أو أضرب نجمة أمريكية يعني زميلة لها فيلم زي ما إحنا لنا فيلم! طيب لو ده حصل كانت فين الصحافة العالمية اللي بتغطي المهرجان، ده لو كان ده حصل كانوا فضحونا وجرسونا وقالوا آدي مصر!! فعدت لأسالها لكن ليه الحكاية دي أصبحت شائعة وليه مش بتكدبيها! مش بكدبها لأن محدش سألني، الناس بتحب تصدق أي حاجة فيها فضيحة، إحنا روحنا عرضنا فيلم شباب إمرأة، ورجعنا بدون جوائز ودة عادي لإن كان فيه أفلام طلاينة وأمريكان وأفلام من كل الدنيا ، حتي التغطية الصحفية كانت أقل من أفلام غيرنا، وأنا قلت أعمل حركة يمكن تلفت النظر ، كل النجمات الخواجات لابسين فساتين سهرة وألماظات وأنا كنت واخده فساتين تجنن ، لكن قلت كدة إحنا بنبيع الميه في حارة السقايين ، فجاتلي فكرة روحت لبست ملاية لف،ومنديل بأوية ، وإتصورت جمب أفيش فيلم شباب إمرأة، طبعا ماقولكيش عن اللي حصل !! صوري مع الإفيش بقت هي حديث الساعة، وأعود لأسألها :يعني بجد إنتي ماشتمتيش سوزان هيوارد وضربتيها بالشبشب !؟ تضحك ببعض المرارة، ده أنا معملتهاش مع الست اللي خربت بيتي. وخدت جوزي وطلعتني من شقتي؟