باسل النجار = الرياض في الخميس 11 يوليو 2024 08:50 مساءً - قال الفنان الراحل عناد حمدي في لقاء قبل وفاته أستاذ عماد ترشح مين الآن برأيك لأدوار الفتى الأول من الشباب الحاليين اللي طالعين ؟!!
إحنا عندنا حاليا في مصر خمس أولاد مش أولاد يعني أولاد… حنقول عليهم أولاد، يعني شباب .. أولا كلهم يشتركوا في حاجة مهمة جدا وهي التعليم العالي. العلم للفنان أهم من الفن نفسه. لأنه بيكونه أخلاقيا وثقافيا وبيعلمه إزاي يقدر يشق طريقه في الحياة وما يغلطش.
مين الأسماء بالترتيب ؟!
انا حأذكرهم لك حسب ترتيب ظهورهم وهم دلوقتي محتلين القمة في السينما العربيةأولهم الأخ محمود ياسين وده راجل عنده شهادة حقوق يعني محامي وفي الوقت نفسه لما حب يمثل دخل المعهد العالي للفنون المسرحية وأخذ الدبلوم بتاعته، فهو يحمل شهادتين.
الثاني اللي يليه حسين فهمي وده شاب متعلم الإخراج في جامعة كاليفورنيا، ومعاه شهادة من هناك. وجه هنا يعمل كمخرج، وهو حاليا معيد في معهد السينما، وبيدرس الإخراج في السينما، إنما لوسامته وحبه للتمثيل ولحاجة الفن للون ثاني، و نجوم جديد يعني أشكال مختلفة إحترف التمثيل، ولو إني سمعت إنه حيبتدي يخرج الأفلام بنفسه يعني هيرجع لشغله الاصلي.
الثالث نور الشريف ده برضه عنده معهد الفنون المسرحية، وشاب ملتزم جدا ومثقف جدا وبيقرا كثير جدا ويشتغل مسرح كثير جدا.
رابعهم سمير صبري ده خريج الجامعة الأمريكية، وراجل بقى لف الدنيا وثقافة عالية، ومقدم برامج عندنا في التلفزيون، حتى بيقدم النادي الدولي اللي هو يعني أشهر برنامج عندنا ولبق جدا وبيعمل أحاديث ويعني ولد على مستوى عالي وفي السينما أصبح في التوب و الصف الأول.
يجي بقى الجديد فيهم آخر واحد اللي هو دخل عليهم، زي السهم .. اللي هو محمود عبد العزيز. ده معاه ماجستير في الزراعة، بس لما أشتغل معانا في “لقيطة” السنة اللي فاتت، كان لسه مبتدئ في السينما. الآن، أصبح منافس للأربعة اللي قلت لك عليهم وهو متعلم ويعني شهادته غريبة جدا، هو متخصص في نحل العسل عنده ماجستير فيها وبيحضر للدكتوراه، فهو شكله وسيم، ويظهر إنه يعني اتصاله بحكاية العسل دي بهتت عليه وبقى حلو زي العسل.
دول الخمسة إللي متصدرين، وفيه طبعا شباب كثير غيرهم ما بقولش حاجة، بس دول الخمسة إللي تقدر تقول عليهم التوب إللي هم يعني تقريبا بيتقاسموا أدوار الشاب الأول دلوقتي.
الفنان الراحل عماد حمدي في لقاء قبل وفاته
