فى بداية السينما المصرية مكنش فيه أى ستات شغالة فى المونتاج.. لان مكنش فى مصر استديوهات أصلا.. وكانوا بيصوروا وقتها فى باريس وكانت اللى بتتولى المونتاج هناك ستات من ايطاليا وفرنسا.. واستمر الوضع على هذا الحال لحد ما جه طلعت حرب وقرر أنه ينشأ استوديو مصر وتعاقد مع سيدة ألمانية اسمها لوتس علشان تتولى عمليات المونتاج الخاصة بالافلام المصرية ..

بدأت الست لوتس تمارس عملها فى مصر بمساعدة بعض من السيدات الاجنبيات لحد ما طلعت باشا بدأ يدور على مصريات يقبلوا يشتغلوا الشغلانة دي .. وكانت اول واحدة تتقدم لها هى ناجية إبراهيم اللى هتقوم بالمهمة دى على اكمل وجه.. لكن بعد فترة هتسيب المونتاج وتحترف التمثيل وتختار لنفسها اسم فنى جديد هو “كوكا”..

اما تانى سيدة تتقدم لمهنة المونتيرة فكانت وفيقة أبو جبل خريجة مدرسة الروم الكاثوليك .. واللى اختبرها طلعت باشا بنفسه فى اللغات والمصطلحات السينمائية قبل ما يعتمدها فى المهنة الجديدة .. واللى برضه تفوقت فيها وفى خلال 4 سنين بقت رئيس قسم المونتاج باستوديو مصر.. وزادت مكانتها بعد ما مدام لوتس قررت أنها ترجع بلدها وقالت كفاية كده فى مصر..

مع رجوع الست لوتس لبلادها بقى الموضوع كله فى ايد الستات المصريات زى وفيقة اللى هتتجوز بعد كده زميلها المونتير صلاح ابو سيف واللى هيبقى بعد كده واحد من أهم مخرجين مصر.. وزي اميرة حرم المونتير والمخرج كمال الشيخ واللى الكل شهد لها بإنها من ابرع المونتيرات فى تاريخ مصر.. وزى كمان الانسة نونو بنت اخت المخرج حسين فوزي والانسة مرسيل صالح بنت الملحن المعروف يوسف صالح..