باسل النجار = الرياض في الجمعة 13 سبتمبر 2024 02:37 مساءً - كان فيه مخرج كبير اسمه أحمد يحيى ..

سأل بطلة فيلمه النجمة نجلاء فتحي ، وقال لها : هتحتاجي جلسرين ؟؟

كانوا بيحتاجوا جلسرين بالمناسبة عشان مشاعد العياط .. وكان المشهد فيه دموع كتير، والراجل قال انه هيقطع عليها بعد ما تاخد الجلسرين !!!

نجلاء فتحي ردت عليه وقالتله ، لأ .. هعمل المشهد كده

الراجل بصلها ، وقال لها تمام .. يالا بينا

نجلاء فتحي وقفته وقالتله : عايز الدموع من العنين والا عين واحدة ؟؟!!!

الراجل بصلها تاني كأنه بيتعامل مع واحدة ممسوسة وقال لها : ممكن عين واحدة ؟؟

قالتله طبعاً ..

الراجل قال يالا بينا هنصور المشهد ، يا ريت ناخده من أول مرة .. يالا بينا و……

نجلاء فتحي وقفته وقالتله : أستاذ احمد بعد إذنك .. عايز الدموع من أنهي عين بالظبط .. اليمين والا الشمال ؟؟!!!!!!

التاريخ بيقول ان الراجل ده ماقطعش شرايينه ، ولا ضحك بسخرية وهو بيفتكرها بتهرج ، ولا قال هو إيه بس يا ربي اللي خلاني ابدأ السكة دي .. الراجل قال لها .. الشمال لو سمحتي

واتعمل المشهد .. ونجلاء فتحي عيطت من عنيها الشمال بس بمنتهى التلقائية ..

قابلت الفنانة الكبيرة من كام سنة، وفكرتها بالحدوتة دي فقعدت تضحك وتقول بشجن : كانت أياااام ..

طب مش ناوية ترجعي ولو ضيف شرف مشهد والا اتنين ؟؟

قالتلي : وانا مجنونة ؟؟ خلاص .. بعد 15 سنة لا يمكن ارجع ..

فقدت الإحساس بالتمثيل وجماله ..

خدت قرار بكده وانا راجعة من تصوير آخر فيلم ..

لا كنت مبسوطة ، ولا كنت باغني في العربية زي ما انا متعودة وانا راجعة البيت بعد التصوير ، ولا كنت حاسة بحلاوة اللي باعمله .. فقررت ابطل .

ما تعملش حاجة ما بتحبهاش ، ولا بتفقد الشغف فيها ..

اعمل اللي يمتعك .. ويخليك بني آدم ..

مش آلة أو موظف ..