باسل النجار = الرياض في الخميس 20 فبراير 2025 05:40 مساءً - لما سألوا تحية كاريوكا مين اكتر اشخاص اثروا في حياتك وساعدوكي في بدايتك اختارت سليمان نجيب أول واحد، وقالت انه كان صاحب فضل كبير عليها حولها من مجرد راقصة لفنانة.
معروف ان تحية كانت بتشتغل وتصرف علي عيلتها عشان كده ما كملتش تعليمها رغم انها كانت في مدرسة فرنساوي، ولما لاحظ سليمان نجيب انها بتنطق فرنساوي كويس سألها وعرف انها سابت التعليم عشان تصرف على اهلها.
سليمان شجعها تكمل تعليمها ولما عرف انها مش حتقدر تتحمل مصارف مدرسة قدملها في مدرسة فرنسية وكان بيدفعلها المصاريف عشان تكمل تعليمها مش كده وبس.
كمان سليمان تحول لمدرس خصوصي وبقى يذاكرلها ويديها كتب فرنساوي عشان تقراها ويناقشها فيها بعد كده عشان يتأكد انها واخدة الموضوع جد ومش عشان حد بيدفعلها المصاريف تكسل او ما تكملش.
سليمان كمان ساعدها على المستوى الفني انه جابلها مدرسة باليه والاتيكيت وتقدر تقول انه تبناها فنيا عشان تتحول لفنانة استعراضية وممثلة مهمة بعد ما كانت داخلة الفن “بتسترزق” زي ما قالت.
