باسل النجار = الرياض في الاثنين 24 أكتوبر 2022 10:55 مساءً - كتب الفنان تامر فرج منشورا عبر حسابه بـ فيسبوك كشف فيه عن حزنه الشديد بسبب قلة أعماله متسائلا عن الأسباب.
وقال فرج :”البوست ده مش حالة اكتئاب ولا يأس ولا انهزاميه خالص!! هو مجموعة أسئلة ارجو انها توصل للقائمين على صناعة الدراما والسينما والفن في البلد وبره البلد وحد يتكرم مشكورا بالرد عليها”.
وأضاف :”الحمدلله الناس كلها بتقولي ان انا موهوب وعندي كاريزما ومش عارف ايه و بيحيونى على أدائي و تمثيلي وشواهد كتير بتقول انى بعرف امثل…واللي يقهر السؤال اللي مش عارف ليه بيتوجهلى انا لما بيقولولى انت ليه مقل في أعمالك؟؟ ده احنا بننتظر مشاهدك و شغلك.. او انت ليه ما بتعملش سينما؟؟ او انت أزاي مابتاخدش مساحات اكبر من كده؟؟؟ زي ما يكون انا اللي مابشتغلش بمزاجي”.
وتابع :”والأسئلة اللي بطرحها للمنتجين والمخرجين هي: انا اسمى تامر فرج ممثل و سيناريست – هل ممكن امثل او اكتب عشان انا موهوب فقط مش عشان عندى عدد فولورز كتير على السوشال ميديا؟
– هل ممكن امثل او اكتب بموهبتى وانا راجل مابحبش اتنطط فى خروجات وكافيهات و سهرات وتجمعات وبفضل انى اقعد فى بيتى مع اسرتى اكتب و اشتغل على نفسى فى التمثيل؟؟
– هل ممكن امثل او اكتب بموهبتى من غير ما اتلزق فى مهرجانات و حفلات لأنى مابحبش اروح اى حدث فنى غير لما اكون معزوم بجد و مرغوب فى وجودى ؟؟؟
– هل ممكن امثل او اكتب بموهبتي من غير ما اقعد استعرض نفسى و صوري على الانستجرام و اكتب صباح الخير و جمعه مباركه و ايه رأيكم فى اللوك الجديد او افضل اسوق نفسى بصوري فى الجيم وانا اتصبب عرقا و افرز عضلات من كل حته في جسمي؟؟؟
وأوضح :”هل ممكن امثل او اكتب بموهبتى من غير ما اسوق لنفسى على السوشيال ميديا بستوريز تافهه او تريندات هايفه لأنى رافض فكرة تسويقى كسلعه على السوشال ميديا رغم انى عارف ان دلوقتى التواجد بالشكل ده ولو بصوره عبيطه او اخبار حراقه عنى وعن اهل بيتى هو الباب المفتوح للشهره والحل الوحيد للتواجد عشان المنتجين والمخرجين يفتكروني، لكن انا للأسف ماتربيتش كده واتربيت على احترام اهل بيتى وانى اشتغل بموهبتي مش بتواجدى وخلاص، و يوم ما هستخدم السوشيال ميديا هستخدمها لنشر الوعى وتقديم محتوى مش عشان اسوق لنفسى، هل ممكن اتعرف بشغلى ولا لازم اتعرف بالسوشال ميديا؟
– هل ممكن امثل او اكتب بموهبتى مش عشان انا من شلة فلان او صاحب فلان؟؟؟ مع العلم ان الوسط كله اصحابى لكن انا مابعرفش افضل ابعت للمخرج فلان و المنتج علان تحياتى و سلاماتى و بوستات عيدكم مبارك و صباح الرضا و مع العلم ان اخويا المخرج العبقري استاذ وائل فرج و مع ذلك مابيقدرش يجيبنى فى اعماله احيانا لأن جهة الانتاج مش موافقه!
– هل ممكن المنتجين والمخرجين يتفرجوا على شغلى فيجيبونى مش اترفض او اتقبل على هوى الكاستنج دايركتور؟
– هل ممكن امثل عشان انا ممثل كويس او كتاباتي توصل عشان انا بكتب كويس مش عشان في واحد ايا كان هو مين انا مش عاجبه او عشان هو مكتفى باللي يعرفه ومش عايز يجرب اللي مايعرفوش؟.
واختتم :” أسف للإطالة لكن عندي أسئلة كتير و الوضع غير مفهوم والناس كلها اللي في الوسط بتقول احنا مش فاهمين ايه اللى بيحصل و ايه السيستم!!! يا جماعه ايه السيستم؟ الدنيا بتمشي أزاي؟
مش عايز ردود تعاطف واللى عايز فعلا يساعدنى يساعد ان البوست ده يوصل او يمنشن حد من الوسط يكون عنده إجابات…انا عايز إجابات فين السيستم؟ ولا نعتزل و نشوف حاجه تانيه؟
