باسل النجار = الرياض في الأحد 12 فبراير 2023 11:20 مساءً - في حوار تلفزيونى للفنانة مريم فخر الدين مع الفنانة صفاء ابو السعود ، كشفت عن اسرار صادمة بشأن علاقة الفنان احمد مظهر بأولاده .

وهذا هو نص الحوار :

– هل صحيح زي ما قولتي انه ولاد احمد مظهر رفعوا عليه قضية حجر؟!
= اه طبعا هو قاللي
– هو اللي قالك؟
= اه اومال هما هيجوا يقولولي ياطنط احنا رفعنا قضية حجر علي بابا؟! دا انا كنت خلعت شبشبي وضربتهم بيه علي دماغهم
– ايه السبب؟!
= كان عنده ٣٠ فدان والفدان بمليون جنيه فكانوا عايزينهم ، فانا كمان كان عندي ١٠ فدادين كتبتهم لولادي عشان ميعملوش معايا كده
– ليه عملوا كده ؟!
= غضبوا عليه وحبسوه ومكنوش بيخلوني اشوفه انا روحت مرة لقيت طليقته ، فقالتلي بيقولوا انك متجوزاه ، قولتلها هو انا لو متجوزاه هسيبك تحطيه في البدورن؟ دا كنت هاخده بيتي واقعده في البلكونة واخليه يتفرج على الاسد في جنينة الحيوانات مش هسيبه ، فهي كانت دايما حاسة اني هتجوزه عشان اخد منه ٣ فداين، وكانت هي وولادها بيعاملوني وحش عشان مروحش اشوفه ، وكل ما اروح يقوللي انا عايز سندوتش شاورما ، يعني هما هيخسروا حاجة لو جابوله؟ .. وسمير صبري كان عايز يعمل معاه حوار فقولتله إديه فلوس ، وفعلا عطاه وفرح بيها جدا لانه مكانش بيشتغل وخدهم حطهم في عِبه ، قامت طليقته مدت ايديها وخدتهم منه قدام الكاميرا ، قولتله خلاص هاتله جبن وحاجات لرمضان خدوهم منه ومكانش معاه تليفون اطمن عليه واخباره انقطعت خالص وكل ما اروح يخبوه مني
– ليه ده كله
= هما حُرين في ابوهم انشالله ياكلوه
– بس حقه انك تساعديه
= والله ساعدته ومش انا لوحدي، نادية لطفي بعتتله حد يخدمه رفضوا!