باسل النجار = الرياض في الاثنين 10 أبريل 2023 03:15 صباحاً - نشرت المؤلفة رشا الجزار بوست عبر حسابها الشخصي بموقع التواصل الاجتماعي فيس بوك تتهم فيه صناع مسلسل جت سليمة بسرقة عملها الفني .
حيث نشرت وقالت : مش بس سارقين اسم العمل واسم الشخصية الرئيسية (البطله)
واللي بيثبت حقي في اللي بقوله تسجيلي للملكية الفكرية في حقوق المؤلف بتاريخ 8/8/2021، يعني من اكتر من سنة ونص
دول كمان سارقين تفصيلة شعر البطله، لكن عشان هم مبدعين وعندهم ضمير وبيخافوا ربنا ومبيسرقوش شغل ومجهود حد، غيروا في التفصيله شوية
– يعني عندي اسم الفيلم (جت سليمة)، واللي له اسقاط ودلالات كتير على الحكاية وبطلتها ورحلتها
* عندهم اسم المسلسل (جت سليمة)، وطبعا دا عشان هم creative جاااامد
– البطله عندي اسمها (سليمة النهاش) بنت إحدى عزب الإسكندرية، بنت من بنات البلد الجدعان، الجدر الاخير والطيب الممتد من نسل النهاش الكبير
* عندهم البطله اسمها سليمة، صدفة طبعا، ولسه مش عارفين اسم ابوها ايه.. اصل كون بنت يبقي اسمها سليمة دا شئ نمطي ومتكرر كتيررررر فعادي يجي في بالهم هو واسم العمل كمان
– عندي شعر البطله ناعم وطويل وغزير وجميل (وكل ستات الحته معجبه بشعر سليمة وحسدنها عليه، مع انها محلتهاش غيره بحسب وجهة نظرهم)
* عندهم مغيرين ومخليين شعرها قصير وكيرلي، التاتش طبعا
– عندي سليمة بيتعرض عليها عرض مستمر لبيع شعرها لصالح صناعة البواريك النسائية للاثرياء وبترفض كل الوقت، بالرغم من ان العرض بيقدم لها سعر مغري جدا على وحده في مستواها الاجتماعي الاقرب لخط الفقر.. لكن سليمة الشبعانه على طبلية ابوها بترفض برده
* عندهم لما سليمة بتاعتهم بتروح الزمن القديم فجأة بتظهر لها ست بتُعجب بشعرها وبتحاول تقصهولها غصب عشان عاجبها وعاوزة تاخده منها بالعافية.. يا سبحان الله
والجديد بقي ..
سليمة اللي عندي واللي غزلت تفاصلها من روحي بتتعرض لظروف قاسية بتجبرها على حلق شعرها وبيعه (بتجبر على فقد جزء هام من انوثتها، كل الستات كانت بصالها فيه، في سبيل انها تتمسك بتحقيق غريزة الامومة)
ياتري سليمة بتاعتهم هتجبر هي كمان على بيع شعرها برده؟ ولا لانهم مبدعين هيخلوها تقصه او يتقصلها غصب عنها؟
مش مسامحة اي حد شارك في سرقة مجهودي وهو عارف انه بيسرق شغل ومجهود وتعب وحلم حد تاني.. منكم لله
وارجع تاني واقولكم سرقتكم لاسم العمل ولاسم البطله ولتفصيلة شعرها – دا لحد دلوقتي – الله اعلم انتوا سارقين ايه تاني.. مكنش هيفرق معاكم خالص في حكايتكم، بل بالعكس مقحم عليها بشكل واضح
لكن انتوا ضرتوني في مشروع كامل خد من روحي اكتر من سنة ونصف
ليه السرقة والاذيه؟ انتوا مسلسل فانتازيا وانا فيلم روائي طويل، دراما اجتماعية
فرقت معاكم في ايه السرقة؟ هل اضافة شئ واووووو لحكايتكم؟ هل حسستكم انكم راضيين وشاطرين ومبدعين؟ اشبعت ايه فيكم عاوزة اعرف
الكاتبة، خاصةً الكتابة الإبداعية بتاخد من روحنا ومن عمرنا ومن وقتنا ومن طاقتنا ومن مشاعرنا ومن طموحنا ومن احلامنا.. يعني مش بس بتسرقوا مجهود اتبذل في الورق، انتوا بتسرقوا حته من روحنا كمان
وان شاءالله هتحصدوا في شغلكم وفي حياتكم حصاد من نفس نوع الزرع.. ماهو اصل ربنا عادل، وانا فوضت امري لله
ومحدش يقولي شوفي محامي
انا هستسلم اسهل عشان هو دا حالنا كلنا في مصر، محدش بياخد حقه غير لو عنده ضهر او عنده شله
https://m.facebook.com/story.php?story_fbid=pfbid0MK57dTBSWkbQr6XLdVTwF8tRLHaysWTNf2SyfZJX8W72u1jYntyP9WQoptaAcF47l&id=560179459&mibextid=Nif5oz
