باسل النجار = الرياض في الخميس 28 سبتمبر 2023 04:05 مساءً - نشرت صفحة الناقد والمشاهد على الفيسبوك، تقييما لمسلسل ” بدون ذكر أسماء”.
شوفت مؤخرا مسلسل “بدون ذكر أسماء” اللى تم إصدارة فى الموسم الرمضاني 2013 وهو من تأليف الكاتب الكبير اللى بحبه وحيد حامد والمخرج المميز تامر محسن وبيحكي عن عدد من الشخصيات فى وقت الثمنينات لغاية التسعينات وبنتابع صراعتهم وتحولاتهم الدرامية وبنشوف رحلة كل واحد فيهم من القاع الفقير للمجتمع الفاسد الغني.
المسلسل دة لازم اي حد يشوفة ومشاهدتة سهلة على اليوتيوب وهو مكون من 30 حلقة ولكن انا عايز اقسم المسلسل دة نصفين ، النصف الاول منه بدايتة كانت قوية جدا وفيه تقديم مناسب لكل الشخصيات بنعرف هما مين وعيشتهم عاملة ازاي ومستوى ثقافتهم وطبيعة شخصيتهم وفطرتهم وبعدين واحدة واحدة بنعرف اية اللى يخليهم واحدة واحدة يغيروا مسارهم ولكن بعد كدة حصل زي ما نقول عملية تكرار.
يعنى تكرار خطوط زي خط نوارة ومعتمد ان يتقدم ويترفض وكل شوية يحصل مشكلة ونلجأ لعاطف وبعدين نرجع نكرر الموضوع ودة حصل مع كذا خط مش الخط دة بس ، بس اللى لم الدنيا الشوية هو ان الحوار كان جذاب وديه اهم ميزة هفتقدها فى إعمال وحيد حامد وان الممثلين بيحاولوا يبيعوا قراراتهم اللى جاية وتخبطاتهم اللى ممكن يتعرضولها وأعتقد مشكلة 30 حلقة ساهمت فى دة وأعتقد يمكن وقتها مكنتش بصيت للمسلسل من الجزئية ديه والله واعلم.
ولكن فى النصف التاني الرتم جري بتاع الاحداث والتحولات بقت كتيرة وفيه ظهور خاص لشخصيات مؤثرة فى احداثنا وصعود وهبوط الشخصيات بقت مقنعة والمشاهد ايقاعها اسرع وهنا قدرت متعة المسلسل اكتر وغير كدة تركيز فى الاحداث ومركز الاهتمام بقت اكتر والمونتاج والتمثيل تحس ان خدوا راحتهم وبقوا بيركزوا يعكسوا حاجات كتير فى وقت اقل والايقاع بقى زي الفيلم مش مجرد مسلسل رمضاني وظة عوضني كتير عن النصف الاول.
الأداء التمثلي كان ممتاز من الجميع وقاصد اقول من الجميع زي احمد الفيشاوي اللى فعلا شخصية عاطف اكتر شخصية حبتها فى المسلسل ويكاد اكتر شخصية شاب واقعية فى الدراما الرمضانية فى التاريخ بل حسيت الفيشاوي هو عاطف وعاطف هو الفيشاوي وديه مش حاجة سهلة ، محمد فراج واللى دايما زي ما قولت هو ممثل ممتاز وجوكر تمثيل ولكن مع تامر محسن له طعم تاني ، حورية فرغلي أفضل أداء فى مشوارها الفني ، سهر الصايغ كانت هايلة ، فريدة سيف النصر عظيمة وتحضيرها للشخصية وانها طخنت للدور 35 كيلو من المعلومات اللى اتفاجأت بيها عن المسلسل لما قريته ، روبي كانت عاملة زي ايقاع المسلسل كان مفاجئ وبعد كدة بقى نمطي وبعد كدة بقى حلو جدا ، مؤمن نور وظهور احمد راتب وشريت رضا وعلاء حسني كانوا جيدين جدا.
وطبعا زي ما قولت وحيد حامد لا يعلى عليه لأنه الراجل دة خلاني مفتقد الافلام والمسلسلات الاجتماعية والسياسية اللى بنفتقرها فى الوقت الحالي وكمان حتى فى اقل اوقات المسلسل الراجل دة عايش بحوار قريبة مننا وبتعلق معانا والمخرج تامر محسن طبعا بداية قوية لأي مخرج انه يبدأ مع وحيد حامد ولكن مقدرش اقول انه برز كل امكانيتة الاخراجية زي ما خرجت وتطورت بعد كدة فى مسلسلات زي هذا المساء اللى بعتبره الافضل ما بين اعمالة ولعبة نيوتن واتمنى انه يرجع ويشتغل سينما ، طبعا العناية بالمونتاج والديكور والملابس والموسيقى التصويرية الرائعة كان ليهم اثر محسوس فى الأحداث
التقييم النهائي:(8/10)
