باسل النجار = الرياض في السبت 30 سبتمبر 2023 01:33 مساءً - أروى جودة لما كانت في برنامج منى الشاذلي قالتلها رتبي الـ ٣ حاجات دول حسب الأولوية: حب، أمان، قصر على مساحة ٣٠٠٠ فدان.
ردت عليها وقالتلها: مانا مش هعرف أحب إلا لو حسيت بالأمان، الأمان هو اللي بيجيب الحب وبيبقاله معني مختلف، لكن الحب مش بالضروره يجيب إحساس بالأمان !
افتكرت مشهد أحلام وهي بتقول لعاصم آخر مرة قبل ماتسيبه مع إن روحها فيه : “عايزة أبقى مع راجل بيحسسني بالأمان، حد بيحبني وهيفضل يحبني طول العمر، عمره ما يكدب عليا، عمره مايقولي حاجة ماحصلتش، عمره ما يخبي عليا سر، عمره ما هيخليني أصحى من النوم وانا خايفة ومقبوضة ومش عارفه ايه اللي ممكن يحصل بكره..”
انت ممكن تبقى في علاقة مع شخص بتحبه جدا بس طول الوقت خايف، متوتر، قلقان تصحى تاني يوم تلاقيه سابك ومشي، حتى وجوده مش مطمنك ولا مخلي روحك تهدا.
‏أي شخص في الدنيا قادر يمنحك الحب، لكن نادراً لما تلاقي شخص يحسسك بالأمان ويخلي كل أيامك تمر بهدوء، وقلبك يكون مطمن وهادي، مش حاسس بأي خوف، محدش يستحق إنه يبقى في علاقة بيصحى من النوم وهو مقبوض بسببها من غير ما يعرف ليه ولا يعرف ايه اللي هيحصل فيها
It’s not all about love .. It’s about safety. ♥️