باسل النجار = الرياض في الأربعاء 1 نوفمبر 2023 11:54 صباحاً - أكبر حلم عند أي عازف أو ملحن إنه يتعاون مع رمز من الرموز الفنية الكبيرة.. فما بالك لما يكون الرمز ده الست “أم كلثوم”!.. أكيد طبعاً الرغبة والحلم هيكبروا.. ده اللي حصل مع الملحن الشاب وقتها “عمار الشريعي” واللي كان نفسه يشتغل مع “أم كلثوم” بس وبسبب حاجة غريبة ومش منطقية خالص راحت الفرصة منه بعد ما بقت فى إيده!..

اللي حصل إن عازف الأورج الشهير “مجدي الحسيني” واللي كان أحد أفراد فرقة “أم كلثوم” إعتذر عن إحياء حفل من حفلات الست بسبب ظروف خاصة بيه.. تم ترشيح إسم “عمار الشريعي” عشان يحل مكانه وتم عرض الإسم على الست اللي وافقت عليه..

لما عرف “عمار” الخبر اتوتر وكان قلقان ومش مصدق نفسه، وطلع جري على بيت الفنانة “زيزي مصطفى” اللي كان بيشتغل معاها فى فرقتها عازف أوكرديون عشان يفرحها معاها.. أخد تاكسي وأخد معاه الأورج بتاعه ولما وصل لـ بيت “زيزي” طلب من السواق ينتظره تحت.. طلع لـ “زيزي” وحكالها وإنبسطت جداً وباركتله وزغرطت ولما نزل “عمار” للتاكسي عشان يروح للست ورغم إنه متأخرش فوق؛ لكن لقي السواق أخد الأورج ومشي!..

الأورج ده أصلاً كان هدية من “بليغ حمدي” لـ “عمار” وكان وقتها بـ 3000 جنيه وهو مبلغ ضخم، والموقف ده طبعاً جنن “عمار” اللي مابقاش عارف يعمل إيه!..

كلم الست وحكالها علي اللي حصل بالظبط فطلبت منه إنه يبعت تلغراف لـ “ممدوح سالم” وزير الداخلية وقتها عشان يعمل بلاغ، وهي نفسها كمان إتصلت بالوزير عشان تبلغه!.. لحد هنا جميل بس اللي ماكنش جميل بالنسبة لـ “عمار” إن الست، وبسبب ضيق الوقت على الحفلة اللي كان ميعادها قرب خلاص جابت بداله “هاني مهني” عشان يعزف فى الحفلة!..

الداخلية رجعّت الأورج بتاع “عمار” بعد حوالي أسبوع من اللي سرقه، بس طبعاً بعد ما كانت فرصة التعاون والحلم الأكبر اللي كان نفسه فيه ضاعت!.