باسل النجار = الرياض في الأحد 19 نوفمبر 2023 06:57 مساءً - بسبب حبه الكبير للتمثيل فشل أحمد زكي فى أنه يدخل مدرسة ثانوي عام ودخل صنايع.. لكن لاجل حظه مدير مدرسة الصنايع كان مغرم بالمسرح وكان بيعمل مسابقة سنوية بين الـ 12 قسم اللى فى المدرسة بحيث أن كل قسم يعمل مسرحية ويعرضوا المسرحيات دى فى شهر رمضان..
أحمد زكي كان داخل المدرسة وهو بيجيد التقليد بدرجة كبيرة جدا.. وشوية شوية بدأ يتدرب على إيد استاذ مهووس بالمسرح هو كمان..وقال عنه احمد زكي أن صاحب أكبر فضل عليه فى البدايات لانه هو اللى فهمه يعني ايه تمثيل وايه الفرق بينه وبين التقليد وازاى يستحضر روح الشخصية ويحولها من ورق الى لحم ودم.. وقال كمان انه بعد فشله فى اختبارات معهد الفنون المسرحية أول مرة .. الاستاذ ده هو اللى وقف جنبه وخلصه من حالة الاكتئاب اللى عاشها وصمم أنه يفضل وراه لحد ما راح معاه المعهد علشان يقدم مرة تانية وفضل يدعمه ويسانده لحد ما نجح فى اختبارات المعهد وطلع الاول كمان.. الاستاذ ده.. اللى شكل اللبنة الاولى فى موهبة العبقري احمد زكي يبقى الاستاذ وفيق فهمي اللى فى الصورة.. واللى ان شاء الله هبقى احكي لكم عنه بالتفصيل بعدين..