باسل النجار = الرياض في الاثنين 27 نوفمبر 2023 04:25 مساءً - سنة 1949 نشرت الكواكب تقرير بعنوان “فتاة الحائط فى نقابات العمال” وقالت أن كل نقابة من النقابات زمان كان لها نجمة معينة بتحبها وتقدرها وتعلق صورها فى مبنى النقابة كنوع من التباهى والتنافس مع باقى النقابات.
يعنى مثلا راقية ابراهيم كانت نجمة نقابة عمال الموبيليا .. وكانت صورها ماليه النقابة.. وكان لها صورة كبيرة فى مدخل النقابة مش بتتغير.. لأن العامل اللى كان معلقها مات فزمايله سابوا الصورة دى تحديدا تخليدا له لانه كان بيعشقها.
اما نقابة عمال الحداده فكانت نجمتهم زوزو ماضي.. وكانوا بيكتبوا على صورتها التواريخ المهمة.. وفى نقابة المحال التجارية هتلاقى نجمتهم المفضلة ليلى فوزي.. لدرجة أن واحد حب يرشح نفسه لانتخابات النقابة فوعد العمال بأنه هيجيب لهم صور جديدة من ليلى فوزي شخصيا لو نجح.. ووعد زى ده كان كفيل بأن الراجل ينجح.. بس اللى حصل انه بعد ما نجح محدش شاف منه اى صور.
نور الهدي بقي كانت نجمة نقابة السواقين.. اما الصبوحة فكانت نجمة عمال صالونات الحلاقة.. وكانوا بيعلقوا صورها عشان يوروا الزباين قصات شعرها.. وكانوا دايما بيحضروا افلامها فى السينمات .. وكانوا اكتر ناس بتهتف لها بعد العرض.
بالنسبة لعمال النقاشة كانت نجمتهم سامية جمال.. وكانوا بيقولوا انها رمز الجمال المصري.. بينما كانت فاتن حمامة نجمة نقابة عمال الميكانيكا .. وكانوا دايما بيقولوا عليها “فاتن اللي فتنتنا”.