باسل النجار = الرياض في الثلاثاء 11 يونيو 2024 09:14 صباحاً - للوهلة الاولى هتحس إن دي صورة الفنان محمد توفيق مع الفنانة كريمة مختار لكن الحقيقة إن دي مش كريمة مختار دي اختها فوزية البدري..
هما تلات اخوات بنات… عطيات البدري اللي هتشتغل في التمثيل وهتبقى كريمة مختار والمذيعة عواطف البدري اللي كانت بتقدم برنامج “إلى الآباء والأبناء” على الإذاعة، والتالتة فوزية البدري اللي اتجوزت من الفنان محمد توفيق.. واللي في الصورة دي تكاد تكون صورة متطابقة من اختها كريمة مختار..
والحقيقة التلاتة شبه بعض، وظهرت كريمة وعواطف البدري في برنامج “يا تلفزيون يا” مع رسام الكاريكاتير رمسيس.. وكانت حلقة من الطف حلقات البرنامج..
محمد توفيق ممثل عظيم لو فاكر مثلا دور ابن صبيحة في فيلم حسن ونعيمة وغيره وغيره… بس كانت امه متضايقة ان ابنها اشتغل في التمثيل، فهو حابب يصالحها وانه بقى حاجة كبيرة في البلد.
فاستغل صداقته مع الفنان سليمان نجيب اللي كان رئيس دار الاوبرا الملكية وهو تاني رئيس مصري ليها، هتلاق كل المواقع كاتبة انه اول رئيس مصري بس دا مش صحيح، المهم.. دخل محمد توفيق مكتب سليمان نجيب وخد جواب من المكتب مختوم وعليه ختم دار الاوبرا.. وكتب عليه أمر ملكي بتعيين محمد بيك توفيق رئيسا لدار الاوبرا الملكية.. مع شوية شكر في نفسه وان مصر بتفخر بيه وبموهبته وبنبوغه.. وراح ورا الجواب لامه.. وماتت وهي مقتنعة ان ابنها رئيس الاوبرا الملكية..