باسل النجار = الرياض في الخميس 29 أغسطس 2024 12:44 مساءً - هادية ورقيقة جدا، ويعلوها مسحة خجل عشان كدة دايما وشها في الأرض لما تكلم أي حد..
وعلى غير العادة، وبالرغم انها بنت منطقة شعبية من قلب القاهرة العتيقة، لكن أنوار وفائي تصرفاتها وكلامها كله مفيهوش ما يدل على إنها متربية في حارة شعبية مصرية..
دا مش عيب من المؤلف في رسم الشخصية، ولكن دا له مبرره عند عكاشة..
ببساطة أنوار دي بنت الأستاذ وفائي، موظف سابق في وزارة الثقافة وعاشق للفن والرسم، فطبيعي انه يربي بنته بلمسة فنية وأخلاقيات الناس المثقفين، عشان كدة كانت شخصية أنوار وفائي مختلفة عن كل بنات الحارة..
بتخرج الصبح وترجع متأخرة بالليل لأنها كانت بتشتغل في مصلحة التليفونات وكانت وظيفتها في الكول سنتر بلغة النهاردة ..
مرتبها زائد معاش باباها الأستاذ وفائي كانو بالكاد ممشيين البيت..
اللي يحببك في الشخصية انها مش مكررة، يعني أنوار وفائي بصفاتها بأحوالها الاجتماعية بوظيفتها بانطواءها موجودة في الحياة، لكن مش أي حد يفطن إليها إلا واحد زي أسامة أنور عكاشة…
حنووونة جدا وطيبة جدا وقلبها طيب اووي ولكن أكثر صفاتها وضوحا هو حياء البنات الجميل ❤
ولأن قلبها بالطيبة والرقة دي، كرست حياتها لتربية بنت أختها، وكانت بتعاني ما بين انها تتجوز اللي بتحبه وللا تتجوز جوز المرحومة أختها عشان تفضل مع ضحى… المسألة دي كانت تاعباها نفسيا جدا..
الحقيقة أنا اول ما شفت تتر المسلسل في العرض الأول شفت اسم لوسي في التتر فاتضايقت جدا وقلت ايه ده؟ بقى لوسي اللي عملت حمدية في ليالي الحلمية عاوزة تقنعني انها البنت الهادية الرقيقة دي؟؟
ولكن لما شفت المسلسل وشفت أداء لوسي للشخصية نسيت تماما ان دي هي نفسها اللي عملت دور حمدية..
وللعلم انا مش بحب لوسي ولا عمري حبيتها حتى في ليالي الحلمية “و دي أذواق ” ولكن انا بيتهيألي انها عملت دور أنوار بتوجيه كامل من جمال عبد الحميد وعكاشة اللي هدفهم هو ان الشخصية تخرج للناس كما رسمها عكاشة بكل تفاصيلها..
يعني اللي يشتغل مع عكاشة وجمال عبد الحميد معندوش رفاهية انه يتدلع ع المخرج او يفرض وجهة نظره او طريقة معينة في أداء الشخصية، عشان كدة عكاشة وجمال عبد الحميد بيقدمو اللي هما شايفينه صح فقط واللي مش حابب يشتغل معانا حسب النص الدرامي يبقى بلاش منه أحسن!
ومع ذلك انا ليا تعقيب على حاجة في قصة أنوار بعتبرها كبوة من كبوات جواد الفارس أسامة أنور عكاشة:
طول المسلسل كان واضح جدا ان في حب بين أنوار وحسن أرابيسك، والكل عارف كدة بما فيهم الست ام حسن وحسني النعماني أخوه..
اتفاجيء في اخر المسلسل ان أنوار اتخطبت لحسني النعماني أخو حسن!!
طب معلش يعني بالمنطق والفطرة كدة ازاي حسن واخوه حسني يبقو قاعدين و أنوار مرات حسني النعماني قاعدة وسطيهم عادي!!
الحكاية دي انا مش قادر أهضمها وشايف انها منافية للفطرة كمان!
ولكن اعترف اني حبيت شخصية أنوار وفائي جدا بل افتقد وجود الشخصيات اللي زيها في حياتنا…
تحية لأسامة أنور عكاشة اللي بيعرف ينبش في الحياة ويطلعلنا شخصيات بالجمال ده..
تحية لجمال لجمال عبد الحميد المخرج المتمكن من أدواته اللي قدملنا روائع..
تحية للفنانة لوسي اللي عملتلنا دور عمرها في شخصية أنوار وفائي ❤
#على_هامش_المسلسل
#أنوار_وفائي