باسل النجار = الرياض في الجمعة 24 يناير 2025 03:23 مساءً - السيدة فاتن حمامة
سنة ٩٩ مكالمة من زميلة دراستى بكلية آداب إسكندرية والإعلامية الجميلة الآن الأستاذة منى المراغى Mona Elmaraghy بتقوللى أروح مدينة الإنتاج أقابل المخرج عادل الأعصر ، رحت طبعاً حسب الموعد عشان دور في مسلسل “وجه القمر” ، دخلت البلاتوه لقيت الأستاذ الكبير جميل راتب والموسيقار الكبير الأستاذ عمر خيرت بالإضافة للممثلين الشباب الصاعد غادة عادل ، نيللى كريم و أحمد الفيشاوى وفجأة لقيتها قدامى وكأنى باحلم مدام فاتن حمامة شخصياً ، طبعاً قعدت فترة مبلم ومتنح ومش عارف أعمل إيه غير إنى أبص لوشها وأتأمل شياكتها ورقتها ،، عرفنى بيها عادل الأعصر وقاللها فى تساؤل “ده ينفع هاشم” ؟
مديت إيدى وسلمت عليها سألتنى “سمعت إنك مغنى شاطر” قلتلها بارتباك شكراً جزيلاً يا فندم … قامت مزعقة بعلو صوتها “بس يا جماعة خلونا نسمع أحمد”
طبعاً كل الأغانى اتمسحت تماماً من دماغى ومشفتش قدامى غير محمد فوزى وهو بيغنيلها فى الفيلم “اللى يهواك إهواه” قمت مغنيها على طول .. وجوم تام فى كل الموجودين بما فيهم مدام فاتن ، حسيت إنى عكيت ونيلت الدنيا باختيار الغنوة دى إلى أن لقيتها بتغنى معايا زى ماكانت بترد على الأستاذ فوزى بالظبط ،، خلصت ، لقيتها بتقرب منّى وتطبع قبلة منها على خدى الأيمن وبتقوللى براڤو عليك ، قلتلها يا فندم انا بسبب البوسة دي مش حاغسل وشى لمدة شهر ، قالتلى بابتسامة عريضة “أنا عارفة ، طبعاً ما إنت إسكندراني ، وكل الإسكندرانية بكاشين كده من أول “عمر الشريف” نظرت لعادل الأعصر وقالتله ، إديله الدور يا عادل .