محمود عزب اللي ضحكنا سنين طويلة مريض جدا

باسل النجار = الرياض في الجمعة 7 فبراير 2025 05:48 مساءً - بقلم بهاء حجازي

كنت بقلب على تيك توك، فشفت لقاء مع محمود عزب (عزب شو)، في بودكاست اسمه كلام من لهب.. شكله خاسس جدا.. لدرجة ان عضم الوش ظاهر في الصورة..

كبر الاستاذ محمود.. من زمان مكنتش شفته.. فرحت اني شفته.. وزعلت انه كبر كدا.. معرفش اذا كان بيعاني من حاجة صحيا ولا لا.. بس اتمناله كل السلامة.. قعدت ادور على لقاءات ليه.. لقيت لقاء ليه مع الزميل سامي عبد الراضي.. وكان بيحكي عن ان اخوه قاعد في العناية المركزة علطول.. فوارد دا يكون السبب..

محمود عزب، او عزب شو كوميديان مهم في تاريخ مصر، من احسن الناس اللي كانوا بيقلدوا.. هو موهوب في الوصول لروح الشخصية.. بالمكياج والتمثيل.. بس كمان كان بيتهتم قوي بالكتابة.. يعني فيه فريق كتابة بيكتب. مش بس بيقلد لا هو بيقول حاجة.

برامج كتير ليه كانت مادة خام للضحك.. زي عزب شوي.. وحكومة شو.. اللي قلد فيه كل وزراء أحمد نظيف الاخيرة.. لقيتني بتفرج على حلقات قديمة ليه.. حلقة زي حلقة مرتضى منصور احمد شوبير جوزيه.. حتى فيروز قلدها..

فاكر انه مرة قلد الابنودي، وقال قصيدة شبه قصايد الخال الابنودي، قصيدة:

جولها يا راندا عليّ اللانده ده الليل نعسان

صرصار الغيط عض في صرصور ودن الواد حسان

حسان عيط لأمه

جالها عايز تلفزيون بريموت

جالتله هو احنا حدانا القوت

ده اخوك راح الجيش وجالو ماعندهش فلات فوت

نجيبلك تلفزيون بريموت ولا نجيب لأخوك فلات فوت

محمود عزب، اقرب حد في الشكل لاستيفان روستي، وفعلا سنة 2010 اتفق على مسلسل اسمه الظرفاء.. بيحكي عن قصة 4 من كوميديانات مصر، من ضمنهم استيفان روستي، لكن اسامة الشيخ وقتها قاله لا خلى استيفان مسلسل لوحده، فمضى مسلسل اسمه “الكونت دي روستي”، عن قصة حياة استيفان روستي،

وقتها.. كانوا بيعملوا مسلسل الريحاني، فطلبوه يعمل دور استيفان روستي، فقالهم مينفعش.. دا انا بعمله مسلسل لوحده، هعمله شخصية في مسلسل، فاعتذر، بالصدفة مسلسل الريحاني اتأجل.. فقامت الثورة ومسلسل استيفان روستي فضل يتأجل يتأجل لحد ما وقف خالص.. ومسلسل الريحاني فضل يتأجل يتأجل لحد ما طلع باسم الضاحك الباكي بطولة عمرو عبد الجليل، وعمل دور استيفان روستي الفنان محمد سليمان..