باسل النجار = الرياض في السبت 14 أكتوبر 2023 10:46 صباحاً - سنة ١٩٩٠ مفيد فوزي سأل عمرو دياب، تفتكر بعد ١٠ سنين من دلوقتي الناس هتفتكر أغنية ميال؟ عمرو كان مهزوز ومش واثق من إجابته لما قال “جايز” ومفيد كان كله ثقة إن الأيام هتنصره لإنه يستحيل حد يفتكر الأغنية دي خلال سنين قليلة، لإنها لا ترتقي لمستوى الأعمال القديمة
سنة ١٩٩٩ نشرت مجلة الكواكب مقال لصحفي شهير مش عايز أقول اسمه، بيشرح فيه مرحلة التشبع والاستسهال اللي أصابت عمرو دياب بعد نجاح نور العين، وإن ألبوم قمرين أعاد عمرو دياب لنقطة الصفر رغم النجاح الجماهيري الخادع بناءًا على تاريخه، أغاني زي “حكاياتي اللي أنا عيشتها” و”لسة بتحبه يا قلبي” كلامها ركيك وحتى أغنية قمرين نفسها سر نجاحها هو الكليب.. وأكد إن عمرو دياب وقع في فخ الغرور.
اتسأل عمرو على المقال دة في برنامج صباح الخير يا مصر، رد وقال “ممكن يكون كلامه صح ودة رأيه وحر فيه، هحاول أعدل دة”!!
سنة ٢٠٠٤ فسخ عمرو دياب عقده بالشراكة التاريخية مع محسن جابر وراح لروتانا، محسن جابر قال نصًا “عمرو دياب معتمد على الشو على المسرح، كلها ٥ سنين وميقدرش يعمل اللي بيعمله لإن السن هيحكم”
في نفس السنة عمرو عمل ليلي نهاري وكان بيلعب ضغط وتعمد استعراض العضلات لأول مرة وغير مساره تمامًا في الشو وبالغ فيه. وبعد ٥ سنين من الألبوم عمل ألبوم وياه ببوستر متصور في صالة جيم وبدأ يتحول في صورة جديدة مميز فيها بعيدًا عن صوته، ولما عمل لقاء مع مفيدة شيحة في برنامج سكوت هنغني مكانش واثق إن شكله حلو وقال أنا بتخن وبخس بسرعة، دة جزء من شغلي ودي حاجة مضايقاني!
تحية للواثقين لحد السما في شغلهم، متواضعين لحد الأرض في نقدهم، البعاد عن التعالي والثابتين بدماغهم وأفكارهم. عمرو دياب زي ناس كتير كانوا ولا يزالوا رمز لجيلهم والاجيال اللي بعدهم وشركاء ذكريات وعمر كامل.. كل سنة وانت طيب يا كبير ♥️