باسل النجار = الرياض في الأحد 12 نوفمبر 2023 12:01 مساءً - تحكي الفنانة #سناء_يونس في حوار نادر عن الفنانين #فؤاد_المهندس و #احمد_زكي
كان حلم حياتي إني بس أعدي من قدام الشارع اللي بتتعرض فيه مسرحيات الاستاذ فؤاد المهندس او الاستاذ عبد المنعم مدبولي ساعتها كانوا اشهر فنانين بيقدموا مسرح وعروضهم كانت دايمآ بتبقي “كومبليت “كامل العدد .
وفي مرة وانا بعمل بروفة لمسرحية كنت شغالة فيها لقيت حد بينده عليا و انا في عز البروفة ولما ركزت كويس لقيته أستاذ فؤاد المهندس طبعا زي العيلة الصغيرة من كتر الفرحة لقيت نفسي بقوله أنا يا استاذ ؟؟ بتنده عليا أنا ؟؟!!
ومن فرحتي سبت البروفة شغالة و روحت له فورآ،،
لقيت المخرج قال بصوت عالي ستوب.. أحنا فين هنا ؟!
قولت له استاذ فؤاد المهندس بيندهلي،، كنت لسه بنت ريفية علي سجيتي جداً.
ساعتها استاذ فؤاد أتدخل عشان المخرج ما يزعلش مني .. المهم لقيت استاذ فؤاد المهندس بيسألني أنتي بتعملي ايه ؟ قولت له بمثل تراجيدي
قالي بلا تراجيدي بلا نكد ,أنتي مكانك مش هنا , بكره تيجي لي المسرح ولقيته راح يستأذن من المخرج عشان ياخدني .. وفعلا عملت أول رواية مع الأستاذ فؤاد المهندس رواية كان أسمها”حالة حب”
وفعلا بجد مش هزار بقيت بعدها أشهر من المحافظ اللي في محافظتي [ الزقازيق ] ، وكان فيه كام واحد من مجانين الفن و التمثيل بيستنوني كل مرة وانا راجعة الزقازيق عشان يستقبلوني مخصوص ولا كأني الست فاتن حمامة في زمنها!!
وكان من ضمن الناس دي شاب أسمر بيحب تمثيلي جداً وفخور بيا أني رفعت أسم الزقازيق بالعمل مع الأستاذ فؤاد المهندس…
الشاب ده هو نجمنا العظيم أحمد زكي.
الفنانة الجميلة سناء يونس تتحدث من القلب في حوار نادر لها