يقول إلهامي سمير:
اعترافات أمين الهنيدي..
اسمي أمين عبدالحميد أمين محمد محمد الهنيدي .. ابن فجر.. اتولدت فجر يوم خميس في المنصورة..
أبويا أيامها كان باشكاتب سجن المنصورة .. وكنا 6 أولاد منهم بنت واحدة وأنا بينهم الخامس..
أبويا كان بيتنقل من سجن لسجن وإحنا وراه لحد ما رقوه ودوده ليمان طره .. دخلت كتاب الشيخ محمد في طرة وعمري 5 سنين ..
كنت طفل شقي .. أمين بإسمى وأخلاقي.. في حياتي لم أسرق غير شلن فضة من جيب أبويا وعمري 6 سنين.. قلت أشتري بيه كرة .. ورحت دفنت الشلن في جنينة جنب بيتنا في القناطر الخيرية لغاية ما تيجي الفرصة.. لكن ضميري أنبني فعاقبت نفسي بإنى سبت الشلن مدفون لحد النهارده.. ومش هقول فين..
4 سنين صياعة بين كليات الجامعة.. اداب.. حقوق لقيتها صعبة بالعربي وحتى الحقوق الفرنساوي .. كل ده علشان أحقق مرامي وأطلع محامي زي يوسف وهبي في رواية “الدفاع”.. أول فيلم سينما تتكحل به عيناي وأنا على دكة الترسو في سينما الأهلي..
فشلت فقعدت فى بيتنا.. قعدت النهار للنوم والليلة للصرمحة والخناق.. أبويا دفع لى 20 جنيه غرامات في جنح ضر*ب .. طاقة معطلة تتف*جر بطريقة خاطئة..
سمعت عن معهد التربية البدنية العالي فقلت أدخله وأطلع لي بدبلوم .. قضيت 3 سنين في المعهد وأنا ماشي جنب الحيط زي اللي عنده سوابق وخايف يتكشف فيترفد ويضيع .. وأخيرا خدت الدبلوم وكنت أول الدفعة..
لما اتخرجت اشتغلت مدرس تربية بدنية في مدارس القاهرة والخرطوم الثانوية .. وطلعت بعثة دراسية في أكاديمية إعداد القادة بمدريد.. سنة 1956 العد*وان الثلاثي حصل وأنا في غربتي.. تألمت ألم ..
بعد ما أخدت الدبلوم ورجعت اشتغلت مدرس في المعهد اللي اتخرجت فيه.. مازلت حتى اللحظة محتفظ بوظيفتي “درجة رابعة” بـ 45 جنيها وشوية .. طبعا بروح المعهد بالتليفون.. لأني بعتذر كل يوم..
بذرة الفن نتبت وأنا في ابتدائي.. كنت رسيم.. أخد في الرسماية 7 من 7 والكراسة تلف الفصل.. وفي ثانوي هويت المونولوج وقلدت إسماعيل ياسين وثريا حلمي في الأفراح وأعياد الميلاد .. ثم انتقلت للتمثيل في الحفلات المدرسية .. وفي إجازة الصيف كنت بشترك مع فرقة جامعة فؤاد..
في الخرطوم الثانوية محمد أحمد المصري “أبو لمعة” كان مدرس زميلي.. عملنا نشاط فني للركب وفي يوم بنفتح الراديو سمعنا برنامج جديد .. إيه ده ؟ برنامج ساعة لقلبك..
وصلنا القاهرة ندور على عبدالمنعم مدبولي ومحمد يوسف ويوسف عوف لقيناهم بيدوروا علينا.. بيسجلوا حلقة من البرنامج في نادي بنك مصر..”تقولوا حاجة؟” ده مدبولي .. طلعت أنا والمصري قلنا نكتتين فلقينا فهمي عمر بيقول لنا “خلاص بقيتوا معانا .. أصبحتم محترفين” .. ورحت أصرف أول أجر من احتراف الفن لقيته 99 قرش.. زي أسعار الأحذية فى شارع 26 يوليو..