باسل النجار = الرياض في السبت 19 أكتوبر 2024 02:37 صباحاً - تعالو نعرف مع بعض مين هو “محمود شكوكو”
وايه موضوع ازايز الصودا والتماثيل
اسمه الحقيقي محمود إبراهيم إسماعيل موسى، اتولد يوم 1 مايو سنة 1912 في حارة بسيطة في حي الجمالية في القاهرة،
اتولد شكوكو ف أسرة بسيطة كلها نجارين وبالتالي هو كمان اشتغل نجار زي والده
شكوكو في بدايته كان بيقلد الفنانين و المغنيين زي محمد عبدالوهاب و محمد عبدالمطلب، لكنه ملقاش نفسه في السكة دي فا فهم ان دي مش سكته وخدها من قصيرها وبعد تماماً عن الغناء و الطرب ، ولقى انه لو اتجه للمونولوج هيكون احسنله بكتير.
السبب في تسميته “شكوكو” كان جده إسماعيل موسى لكن والده كان مش عاجبه الحال وكان مصمم يناديه “محمود”
طب تعرف ان شكوكو هو الفنان الوحيد في مصر اللي كان بيتعمله تماثيل وتتباع
️ القصه دي حلوه اوي وبتبين شطارة المصريين
كان زمان بيلف بياعين تماثيل صغيره كده على شكل شكوكو شوارع مصر كلها .
الغريب في الموضوع انهم مكانوش بيبيعوها بفلوس، مكانوش بيرضوا يبيعوها غير مقابل ازازة حاجه ساقعه،
اي حد عنده ازازة يديها للبياع وياخد تمثال شكوكو .. وكانت الناس حرفيا ما بتصدق الراجل يعدي هووب البضاعه كلها تخلص ..
الحكايه دي وصلت لشكوكو وفرح جدا بس استغرب ليه المقابل مش فلوس .. ليه ازازة حاجه ساقعه !!
دور ورا الموضوع واكتشف حاجه جميله اوي
ايام الاحتلال كانوا الفدائيين وفرق المقاومه بيعملوا قنبله صغيره عباره عن شوية بنزين او سبرتو في ازازة حاجه ساقعه وفيها حتة قماشه يولعوا فيها ويرموها على اي حاجه تبع الاحتلال يحرقوه “مولتوف يعني”
الانجليز مكانوش عارفين يعملوا ايه لان النار بتبقى عشوائيه وبتمسك في اي حاجه قدامها وبتاخد وقت على ما يعرفوا يطفوها..
ففكروا انهم يمنعوا خالص ازايز الحاجه الساقعه،
وفعلا الازايز بقت قليله اوي في السوق وتم استبدالها بالبلاستيك وطبعا ده لما بيتحدف مبيفرقعش زي الازاز
طب نعمل ايه؟
فكروا مين اكتر حد محبوب وملاقوش ساعتها اكتر من “شكوكو” في الاحياء الشعبيه .
بقوا يعملوا تماثيل صغيره شبه شكوكو بجلابيته وشنبه وطاقيته ويبدلوها بالازايز ،
زمان كان المصريين بيحتفظوا بالازايز وتروح عند البقال تبدلها بواحده مليانه وتدفع نص الثمن بس، فكان كل البيوت فيها ازايز .
وفعلا الفكره انتشرت والناس كلها عجبها التمثال وبقت تبدله وده بقى يوفر للمقاومه الازايز اللي محتاجينها عشان يرموها على الانجليز .
شكوكو وصل لحقيقة الموضوع ده واللي حكى الحكايه دي ابنه سلطان .
شكوكو كلنا عارفين تاريخه الفني الكبير وعارفين انه يعتبر تشارلي شابلين العرب
عاش شكوكو حياته بيمتع الناس بفنه وبيساعد المقاومة في مهمتهم و بيضحك الناس بمونولوجاته…
وللأسف شمس شكوكو غابت عننا يوم 21 فبراير سنة 1985 في سن 72 سنة .
الله يرحمه كان جميل ودمه خفيف واغانيه حلوه ويدخل القلب بسهوله.
