باسل النجار = الرياض في الخميس 6 مارس 2025 03:12 مساءً - حين وقفت أمام نجيب الريحاني أول مرة لم يتوسم فى شخصي شيئا من الموهبة.. أو حتى الاستعداد الفني..
يومها مال على بديع خيري وقال له
ـ إيه دي يا سي بديع ؟ تعرفها؟
: أيوه..
ـ يعني كويسة؟
: أيوه.. شفتها بتمثل كويس أوي فى روض الفرج .. واسمها ماري منيب..
ـ يعني تنفعنا ؟
: أعتقد إنها تنفعنا أوي..
وكنت أقف بعيدا قليلا فأشار إلي قائلا : “تعالي يا شاطرة”.. فاقتربت منه فأخذ يفحصني بنظره من جديد .. وسألني “انتي بتعرفي تمثلي؟”.. فقلت وأنا فى شدة الاضطراب “أيوه” .. فضحك بديع خيري وقال “دي كانت بريمادونة فرقة فوزي منيب.. انت تعرفه طبعا.. كان يهوى الفن معاك لما كنتم هواة؟”..
وقال الريحاني مازحا “أمال مالك دبلانة فى نفسك كده ليه؟”.. وهنا جمعت أطراف شجاعتي وقلت “تقدر تجربني.. وتشوف بنفسك .. وعلى رأي المثل الميه تكدب الغطاس .. يمكن اللي شايفها دبلانة دي لما تقف على المسرح تبقى حاجة تانية !”.. فقال “انتي باين عليكي جريئة ومسحوبة من لسانك.. وأنا يعجبني كده.. شوفى بقى.. أنا همتحنك فى دور صغير .. إن سقطتي فى الامتحان تروحي من هنا على بيتكم دوغري .. وإذا نجحتي يبقى من بختكك” .. فقلت “خلاص اتفقنا”..
وانصرفت لأعود فى اليوم التالي لإجراء الامتحان فى دور صغير بمسرحية “الدنيا على كف عفريت”.. وقبل أن أغادر الحجرة قال لي “انتي باين عليكي مؤدبة أكتر من اللازم .. لكن الدور اللي هتاخديه فيه شوية جرأة”..
وفى اليوم التالي أعطاني الدور .. وكان دور فتاة من بنات الهوى فى كبارية .. وأديت الدور والريحاني يراقبني بدقة.. وعلامات الدهشة تتجلى على وجهه .. وهمس فى أذن بديع خيري قائلا “دي مدهشة يا سي بديع.. ماكنتش مصدق إنها تنجح بالشكل ده.. دي كويسة جدا ويجي منها فى المستقبل”..
وأبدى استحسانه لي ثم اتفق معي على مرتب 15 جنيها شهريا.. ولما قلت له إني كنت أتقاضى 20 جنيها فى فرقة فاطمة رشدي قال “انتي هنا حقك تدفعي فلوس .. اسمعي.. قبل ما تمشي ابقى عدي عليا”..
وجلست أنتظر فراغه من البروفات.. وأنا أحسب ألف حساب لهذه المقابلة.. وكنت أقول لنفسي إنه سيعطيني بقية حسابي ويفصلني من الفرقة.. وساورني الأسف الشديد حين خطر لي أني سأنفصل عن الفرقة التى كنت أبني على وجودي فيها الآمال الكبار.. ولكني أخذت أعزى نفسي “وانتي يا بت كان لك بخت فى الدنيا لما هيكون لك بخت مع الريحاني؟”..
وفرغ نجيب من البروفات.. ودخلت مكتبه فوجدته يقول “أنا يا ماري مش عارف أشكرك إزاي.. إنتي كنتي كويسة جدا وتعبتي.. وأنا عايز أكافئك المكافأة اللي تستاهيلها لكن العين بصيرة والخزنة قصيرة.. عموما عايزك تقبلي المبلغ ده.. وتعتبريه مكافأة رمزية”..
ولما هممت أن أشكره قاطعني قائلا “تسمحي بقى تقفلي الباب من برة .. وتزقي عجلك”..
وانصرفت ضاحكة.. وفتحت المظروف فوجدته به 20 جنيها فرحت بها أكثر من كل ما ربحته من مال.. فقد خيل إلى أنها كأس التفوق الفضية التى تُمنح للفائز فى مباراة أو مسابقة..
ماري منيب..
#الحكواتي_الهامي_سمير
#الهامي_سمير
