باسل النجار = الرياض في الجمعة 31 مارس 2023 10:39 مساءً - أثار المخرج عمرو سلامة الجدل عبر تويتر بعد أن اعترض على موجة المطالبات بمنع عرض مختلف الأعمال العربية، مثل المسلسل التونسي “فلوجة” والكويتي “دفعة لندن.

كتب عمرو سلامة: “حاليا، هناك مطالبات في الكويت لوقف مسلسل كويتي، هناك مطالبات في تونس لوقف مسلسل تونسي، هناك متطرفين يطالبون بوقف مسلسل تاريخي ديني مصري. المتفرج العربي ديكتاتور مصغر، رقيب مصغر، كل فرد أو فئة مؤمنة إن من حقها تحكم على باقي البشر وتتحكم في يشوفوا ايه ومايشوفوش إيه، في عصر المواقع الاباحية ومواقع الالحاد على بعد كام دوسة على الموبايل، ولو محجوبة يعني على بعد كام دوسة وحتة تطبيق vpn .. امتى كمواطن عربي هتخليك في نفسك؟ هتسيب غيرك يتكلم؟ وتسيب غيرك يسمع؟ وتسيب غيرك يختار بنفسه؟ وتتعامل ان الناس من حقها ذوقها وافكارها مايبقوش شبهك؟ امتى هتعرف ان سلاحك هو التمنع مش المنع، هتواجه بالتفكير مش بالتكفير، هتدافع عن فكرك بالمنطق مش بالسيف والرصاصة والمقص؟ اعتقد كلنا عارفين امتى ده كله هيحصل”.

وبعد اعتراض بعض المتابعين، شرح المخرج وجهة نظره كاتبًا: “أنا مش ضد إبداء الجمهور لأي رأي في أي عمل فني .. أنا ضد المطالبة بالإلغاء أو المنع أو الوقف. أنا بشوف أعمال -بتوصف نفسها إنها أعمال فنية- وهي غير أخلاقية ومنحطة وكسولة ومتكروتة ومزيفة ولا تحترم الجمهور ولا الفن، لكن عمري ما هطالب بمنعها، وسيلتي لمعاقبتها هو الحجوب عنها وإني أشوف العمل الكويس وأحييه وأدعمه”.